NEWS PAPER CLIPPINGS: 28-1-2025

 NEWS PAPER CLIPPING: 27-1-2025

 NEWS PAPER CLIPPINGS :

DATE: 18-1-2025

                                       NEWS PAPER CLIPPINGS, DATE; 6-1-2025

                                                  NEW ARRIVAL OF PRINT JOURNALS

01-01-2025

                                   NEWS PAPER CLIPPINGS, DATE; 29-12-2024

ಸ್ಪೇಡೆಕ್ಸ್‌ ಯೋಜನೆಯಲ್ಲಿ ಆದಿಚುಂಚನಗಿರಿ ಇಂಜಿನಿಯರಿಂಗ್‌ ಕಾಲೇಜುಗಳ ಪಾತ್ರ; ನವ ಪೀಳಿಗೆಯ ಬಾಹ್ಯಾಕಾಶ ಮಂತ್ರ

Authored Byಗಿರೀಶ್ ಲಿಂಗಣ್ಣ | Edited byನಿಖಿಲ್‌ ಕುಲಕರ್ಣಿ | Vijaya Karnataka Web29 Dec 2024, 12:04 pm

Subscribe

ಬಾಹ್ಯಾಕಾಶ ಕ್ಷೇತ್ರದಲ್ಲಿ ಮತ್ತೊಂದು ಐತಿಹಾಸಿಕ ಸಾಧನೆಗೆ ಸಜ್ಜಾಗಿರುವ ಭಾರತದ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ ಇಸ್ರೋ, ನಾಳೆ(ಡಿ.30-ಸೋಮವಾರ) ಸ್ಪೇಡೆಕ್ಸ್‌ ಮಿಷನ್ ಕಾರ್ಯಾಚರಣೆಗೆ ಚಾಲನೆ ನೀಡಲಿದೆ. ಅಮೆರಿಕ, ರಷ್ಯಾ, ಚೀನಾ ನಂತರ ಬಲವಾದ ಬಾಹ್ಯಾಕಾಶ ಡಾಕಿಂಗ್‌ ವ್ಯವಸ್ಥೆಯನ್ನು ಹೊಂದಿರುವ ವಿಶ್ವದ ನಾಲ್ಕನೇ ರಾಷ್ಟ್ರವಾಗಿ ಭಾರತ ಹೊರಹೊಮ್ಮಲಿದೆ. ಈ ಮಧ್ಯೆ ಈ ಯೋಜನೆಯಲ್ಲಿ ಕರ್ನಾಟಕದ ಎರಡು ಇಂಜಿನಿಯರಿಂಗ್ ಕಾಲೇಜುಗಳು ಸ್ಪೇಡೆಕ್ಸ್‌ನ ಪಿಒಇಎಂ 4 ಯೋಜನೆಯ ಹತ್ತು ಪೇಲೋಡ್‌ಗಳಿಗೆ ಗಮನಾರ್ಹ ಕೊಡುಗೆ ನೀಡಿವೆ. ಈ ಕುರಿತು ನಾಡಿನ ಖ್ಯಾತ ಬಾಹ್ಯಾಕಾಶ ಲೇಖಕರಾದ ಗಿರಿಶ್‌ ಲಿಂಗಣ್ಣ ಅವರು ಬರೆದ ವಿಶೇಷ ಲೇಖನ ಇಲ್ಲಿದೆ.

• ಬಾಹ್ಯಾಕಾಶದಲ್ಲಿ ಇತಿಹಾಸ ಬರೆಯಲು ಸಜ್ಜಾದ ಭಾತರತದ ಇಸ್ರೋ
• ಸ್ಪೇಡೆಕ್ಸ್‌ ಮಿಷನ್‌ ಕಾರ್ಯಾಚರಣೆಗೆ ಸಜ್ಜಾದ ಭಾರತದ ಬಾಹ್ಯಾಕಾಶ ಸಂಸ್ಥೆ
• ಸ್ಪೇಡೆಕ್ಸ್‌ ಮಿಷನ್‌ನಲ್ಲಿ ಆದಿಚುಂಚನಗಿರಿ ಇಂಜಿನಿಯರಿಂಗ್‌ ಕಾಲೇಜುಗಳ ಪಾತ್ರವೇನು?
• ಆರ್‌ವಿ ಕಾಲೇಜ್ ಆಫ್ ಇಂಜಿನಿಯರಿಂಗ್ ಮತ್ತು ಎಸ್‌ಜೆಸಿ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ ಕಾಲೇಜುಗಳು

ಪಿಒಇಎಂ 4 ಯೋಜನೆಯಲ್ಲಿ ಮಿಂಚು ಹರಿಸಲಿವೆ ಕರ್ನಾಟಕದ ಇಂಜಿನಿಯರಿಂಗ್ ಕಾಲೇಜುಗಳು

ಕರ್ನಾಟಕದ ಎರಡು ಇಂಜಿನಿಯರಿಂಗ್ ಕಾಲೇಜುಗಳು ಸ್ಪೇಡೆಕ್ಸ್‌ನ ಪಿಒಇಎಂ 4 ಯೋಜನೆಯ ಹತ್ತು ಪೇಲೋಡ್‌ಗಳಿಗೆ ಗಮನಾರ್ಹ ಕೊಡುಗೆ ನೀಡಿವೆ.

1. ಜೀವಶಾಸ್ತ್ರ ಅಧ್ಯಯನ:

ಬೆಂಗಳೂರಿನ ಆರ್‌ವಿ ಕಾಲೇಜ್ ಆಫ್ ಇಂಜಿನಿಯರಿಂಗ್ ಬಾಹ್ಯಾಕಾಶದಲ್ಲಿ ಕರುಳಿನ ಬ್ಯಾಕ್ಟೀರಿಯಾಗಳ ಬೆಳವಣಿಗೆಯನ್ನು ಅಧ್ಯಯನ ನಡೆಸಲಿದೆ.

2. ಬಿಜಿಎಸ್ ಅರ್ಪಿತ್:

ಚಿಕ್ಕಬಳ್ಳಾಪುರದ ಎಸ್‌ಜೆಸಿ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ ವಿನ್ಯಾಸಗೊಳಿಸಿರುವ ಬಿಜಿಎಸ್ ಅರ್ಪಿತ್, ಉಪಗ್ರಹದಿಂದ ಧ್ವನಿ, ಅಕ್ಷರ, ಮತ್ತು ಛಾಯಾಚಿತ್ರಗಳು ಸೇರಿದಂತೆ ಸಂದೇಶಗಳನ್ನು ಎಫ್ಎಂ ಸಂಕೇತಗಳು ಮತ್ತು ವಿಎಚ್ಎಫ್ ಬ್ಯಾಂಡ್ ಬಳಸಿಕೊಂಡು ಭೂಮಿಗೆ ಕಳುಹಿಸಲಿದೆ. ಈ ತಂತ್ರಜ್ಞಾನ ಜಗತ್ತಿನಾದ್ಯಂತ ಅಮೆಚೂರ್ ರೇಡಿಯೋ ಸೇವೆಗಳಿಗೆ ನೆರವು ನೀಡುತ್ತದೆ.

1986ರಲ್ಲಿ ಬೆಂಗಳೂರಿನ ಸನಿಹದ ಚಿಕ್ಕಬಳ್ಳಾಪುರದಲ್ಲಿ ಸ್ಥಾಪಿಸಲಾದ ಎಸ್‌ಜೆಸಿ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ ಶ್ರೀ ಆದಿಚುಂಚನಗಿರಿ ಶಿಕ್ಷಣ ಟ್ರಸ್ಟ್‌ನಿಂದ ನಿರ್ವಹಿಸಲ್ಪಡುತ್ತಿದೆ. ಈ ಟ್ರಸ್ಟ್ ಶ್ರೀ ಶ್ರೀ ಶ್ರೀ ಡಾ. ಬಾಲಗಂಗಾಧರನಾಥ ಮಹಾ ಸ್ವಾಮೀಜಿಯವರ ಆಶೀರ್ವಾದ ಮತ್ತು ಸ್ವತಃ ಗೌರವಾನ್ವಿತ ಐಐಟಿಯಲ್ಲಿ ವ್ಯಾಸಂಗ ನಡೆಸಿರುವ ಶ್ರೀ ಶ್ರೀ ಶ್ರೀ ಡಾ. ನಿರ್ಮಲಾನಂದನಾಥ ಮಹಾ ಸ್ವಾಮೀಜಿಯವರ ಮಾರ್ಗದರ್ಶನದಲ್ಲಿ ಕಾರ್ಯಾಚರಿಸುತ್ತಿದೆ.

ಜೊತೆಯಾಗಿ, ಇವೆರಡು ಸಂಸ್ಥೆಗಳು ವಿಜ್ಞಾನ ಮತ್ತು ಇಂಜಿನಿಯರಿಂಗ್‌ನಲ್ಲಿ ಆಧುನಿಕ ಸಂಶೋಧನೆ ಮತ್ತು ತಂತ್ರಜ್ಞಾನದ ಸಾಧನೆಗೆ ಕರ್ನಾಟಕದ ಬದ್ಧತೆಯನ್ನು ಪ್ರದರ್ಶಿಸಿವೆ.

ಗಿರೀಶ್ ಲಿಂಗಣ್ಣ

(ಲೇಖಕರು ಬಾಹ್ಯಾಕಾಶ ಮತ್ತು ರಕ್ಷಣಾ ವಿಶ್ಲೇಷಕ)

ಭಾರತ ತನ್ನ ಬಾಹ್ಯಾಕಾಶ ಯಾತ್ರೆಯಲ್ಲಿ ಹೊಸದೊಂದು ಮೈಲಿಗಲ್ಲು ಸೃಷ್ಟಿಸಲು ಕಾತರಿಸುತ್ತಿದೆ. ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ತನ್ನ ಮಹತ್ವಾಕಾಂಕ್ಷಿ ಸ್ಪೇಡೆಕ್ಸ್ ಯೋಜನೆಯನ್ನು ಸೋಮವಾರ, ಡಿಸೆಂಬರ್ 30ರಂದು ಭಾರತೀಯ ಕಾಲಮಾನ ರಾತ್ರಿ 9:58ಕ್ಕೆ ಉಡಾವಣೆಗೊಳಿಸಲು ಸಿದ್ಧತೆ ನಡೆಸಿದೆ.

ಸ್ಪೇಡೆಕ್ಸ್ (ಸ್ಪೇಸ್ ಡಾಕಿಂಗ್ ಎಕ್ಸ್‌ಪರಿಮೆಂಟ್) 2024ರಲ್ಲಿ ಇಸ್ರೋದ ಅಂತಿಮ ಯೋಜನೆಯಾಗಿದೆ. ಇದೊಂದು ಕಡಿಮೆ ವೆಚ್ಚದ ಯೋಜನೆಯಾಗಿದ್ದು, ಬಾಹ್ಯಾಕಾಶದಲ್ಲಿ ಡಾಕಿಂಗ್ ನಡೆಸುವ ತಂತ್ರಜ್ಞಾನವನ್ನು ಪ್ರದರ್ಶಿಸಲು ವಿನ್ಯಾಸಗೊಂಡಿದೆ. ಡಾಕಿಂಗ್ ಪ್ರಕ್ರಿಯೆಯಲ್ಲಿ ಎರಡು ಬಾಹ್ಯಾಕಾಶ ನೌಕೆಗಳನ್ನು ಬಾಹ್ಯಾಕಾಶದಲ್ಲಿ ಒಂದಕ್ಕೊಂದು ಜೋಡಿಸಲಾಗುತ್ತದೆ. ಈ ಯೋಜನೆಯನ್ನು ಇಸ್ರೋದ ಪಿಎಸ್ಎಲ್‌ವಿ ರಾಕೆಟ್ ಮೂಲಕ ಉಡಾವಣೆಗೊಳಿಸಲಾಗುತ್ತದೆ.

ಚಂದ್ರನಂಗಳಕ್ಕೆ ಮಾನವರನ್ನು ಕಳುಹಿಸುವುದು, ಚಂದ್ರನಿಂದ ಮಾದರಿಗಳನ್ನು ಸಂಗ್ರಹಿಸುವುದು, ಭಾರತೀಯ ಅಂತರಿಕ್ಷ ಸ್ಟೇಷನ್ (ಬಿಎಎಸ್) ನಿರ್ಮಾಣ ಮತ್ತು ಕಾರ್ಯಾಚರಣೆ ಸೇರಿದಂತೆ, ಭಾರತದ ಭವಿಷ್ಯದ ಮಹತ್ತರ ಬಾಹ್ಯಾಕಾಶ ಯೋಜನೆಗಳಿಗೆ ಈ ತಂತ್ರಜ್ಞಾನ ಅತ್ಯವಶ್ಯಕವಾಗಿದೆ. ಸ್ಪೇಡೆಕ್ಸ್ ಯೋಜನೆ ಬಾಹ್ಯಾಕಾಶ ನೌಕೆಗಳ ಡಾಕಿಂಗ್ ತಂತ್ರಜ್ಞಾನವನ್ನು ಪ್ರದರ್ಶಿಸುವ ಮೂಲಕ, ಭಾರತದ ಪಾಲಿಗೆ ಮಹತ್ವದ ಸಾಧನೆಯಾಗಲಿದೆ.

ಈ ಯೋಜನೆಯ ಮೂಲಕ, ಭಾರತ ಬಾಹ್ಯಾಕಾಶ ಡಾಕಿಂಗ್ ತಂತ್ರಜ್ಞಾನವನ್ನು ಅಭಿವೃದ್ಧಿ ಪಡಿಸಿರುವ ಜಗತ್ತಿನ ಕೇವಲ ನಾಲ್ಕನೇ ರಾಷ್ಟ್ರವಾಗಿ ಹೊರಹೊಮ್ಮಲಿದೆ ಎಂದು ಇಸ್ರೋ ಘೋಷಿಸಿದೆ. ಪ್ರಸ್ತುತ, ಕೇವಲ ಅಮೆರಿಕಾ, ರಷ್ಯಾ ಮತ್ತು ಚೀನಾಗಳು ಮಾತ್ರವೇ ಬಾಹ್ಯಾಕಾಶದಲ್ಲಿ ಎರಡು ಬಾಹ್ಯಾಕಾಶ ನೌಕೆಗಳನ್ನು ಒಂದಕ್ಕೊಂದು ಜೋಡಿಸುವ ಸಾಮರ್ಥ್ಯ ಹೊಂದಿವೆ.

ಯೋಜನೆಯ ಹೆಚ್ಚುವರಿ ಗುರಿಗಳು

1. ಡಾಕಿಂಗ್ ನಡೆಸಿರುವ ಎರಡು ಬಾಹ್ಯಾಕಾಶ ನೌಕೆಗಳ ನಡುವೆ ವಿದ್ಯುತ್ ಶಕ್ತಿ ಹಂಚಿಕೊಳ್ಳುವಿಕೆ ಅತ್ಯಂತ ಮುಖ್ಯವಾಗಿದೆ. ಯಾಕೆಂದರೆ, ಈ ಪ್ರಕ್ರಿಯೆಯ ಮೂಲಕ, ಒಂದು ಬಾಹ್ಯಾಕಾಶ ನೌಕೆ ಇನ್ನೊಂದಕ್ಕೆ ಶಕ್ತಿ ನೀಡಲು ಸಾಧ್ಯವಾಗುತ್ತದೆ. ಭವಿಷ್ಯದಲ್ಲಿ ಬಾಹ್ಯಾಕಾಶ ರೋಬೋಟ್‌ಗಳನ್ನು ಒಳಗೊಂಡ ಯೋಜನೆಗಳಿಗೆ ಈ ಪ್ರಕ್ರಿಯೆ ಅನಿವಾರ್ಯವಾಗಿದೆ. ರೋಬೋಟ್‌ಗಳು ಬಾಹ್ಯಾಕಾಶದಲ್ಲಿ ದುರಸ್ತಿ, ಜೋಡಣೆ ಅಥವಾ ಪ್ರಯೋಗಗಳನ್ನು ನಡೆಸಲು ನಿರಂತರವಾಗಿ ಸಮರ್ಪಕ ವಿದ್ಯುತ್ ಪೂರೈಕೆಯ ಅವಶ್ಯಕತೆ ಇರುತ್ತದೆ. ಈ ರೀತಿ ವಿದ್ಯುತ್ ಶಕ್ತಿಯನ್ನು ಹಂಚಿಕೊಳ್ಳುವ ಮೂಲಕ, ಬಾಹ್ಯಾಕಾಶ ನೌಕೆ ರೋಬಾಟಿಕ್ ಸಿಸ್ಟಮ್‌ಗಳಿಗೆ ಅವುಗಳ ನಿಗದಿತ ಶಕ್ತಿಯ ಮೇಲೆ ಅವಲಂಬಿತವಾಗುವ ಬದಲಿಗೆ, ಹೆಚ್ಚುವರಿ ಶಕ್ತಿಯನ್ನು ಪೂರೈಸಲು ಸಾಧ್ಯವಾಗುತ್ತದೆ. ಇದರಿಂದ ಬಾಹ್ಯಾಕಾಶದಲ್ಲಿ ಸುದೀರ್ಘ ಅವಧಿಯ ಕಾರ್ಯಾಚರಣೆಗಳು ಹೆಚ್ಚು ದಕ್ಷ ಮತ್ತು ನಂಬಿಕಾರ್ಹವಾಗುತ್ತವೆ.

2. ಬಾಹ್ಯಾಕಾಶದಲ್ಲಿ ಜೋಡಣೆಯಾಗಿರುವ ಎರಡು ಬಾಹ್ಯಾಕಾಶ ನೌಕೆಗಳು ಒಂದೇ ನೌಕೆಯಂತೆ ಕಾರ್ಯಾಚರಿಸುವುದು, ಮತ್ತು ಅವುಗಳು ಬೇರ್ಪಟ್ಟ ಬಳಿಕ ತಮ್ಮ ಪೇಲೋಡ್‌ಗಳ ಕಾರ್ಯಗಳನ್ನು (ಉಪಕರಣಗಳು ಅಥವಾ ಪ್ರಯೋಗಗಳು) ನಿರ್ವಹಿಸುವುದು ಬಹಳ ಮುಖ್ಯವಾಗಿದೆ. ಇದರಿಂದಾಗಿ, ಉಭಯ ಬಾಹ್ಯಾಕಾಶ ನೌಕೆಗಳು ಜೋಡಿಸಲ್ಪಟ್ಟಾಗ ಮತ್ತು ಪ್ರತ್ಯೇಕಗೊಂಡಾಗಲೂ ಸುಗಮವಾಗಿ ಕಾರ್ಯಾಚರಿಸುವುದು ಖಾತ್ರಿಯಾಗುತ್ತದೆ. ಸ್ಪೇಡೆಕ್ಸ್ ಯೋಜನೆಯಲ್ಲಿ, ಎರಡು ಸಣ್ಣ ಬಾಹ್ಯಾಕಾಶ ನೌಕೆಗಳಾದ ಟಾರ್ಗೆಟ್ ಮತ್ತು ಚೇಸರ್‌ಗಳು ತಲಾ 220 ಕೆಜಿ ತೂಕ ಹೊಂದಿದ್ದು, ಪಿಎಸ್ಎಲ್‌ವಿ-ಸಿ60 ರಾಕೆಟ್ ಮೂಲಕ ಜೊತೆಯಾಗಿಯೇ ಉಡಾಯಿಸಲ್ಪಡುತ್ತವೆ. ಅವೆರಡೂ ಬಾಹ್ಯಾಕಾಶ ನೌಕೆಗಳನ್ನು ಸ್ವತಂತ್ರವಾಗಿ, ಆದರೆ ಒಂದೇ ಸಮಯದಲ್ಲಿ ವೃತ್ತಾಕಾರದ ಭೂಮಿಯ ಕೆಳಕಕ್ಷೆಯಲ್ಲಿ ಅಳವಡಿಸಲಾಗುತ್ತದೆ. ಈ ಯೋಜನೆ ಎರಡು ವರ್ಷಗಳ ಕಾಲ ಕಾರ್ಯಾಚರಿಸಲಿದೆ. ಪಿಎಸ್ಎಲ್‌ವಿ ರಾಕೆಟ್‌ನ ಅಸಾಧಾರಣ ನಿಖರತೆಯನ್ನು ಬಳಸಿಕೊಂಡು, ಟಾರ್ಗೆಟ್ ಮತ್ತು ಚೇಸರ್ ಉಪಗ್ರಹಗಳನ್ನು ಬಾಹ್ಯಾಕಾಶದಲ್ಲಿ ಬಿಡುಗಡೆಗೊಳಿಸುವಾಗ, ಅವುಗಳ ವೇಗದ ನಡುವೆ ಸಣ್ಣ ಅಂತರವನ್ನು ಸೃಷ್ಟಿಸಲಾಗುತ್ತದೆ. ವೇಗದಲ್ಲಿನ ಸಣ್ಣ ವ್ಯತ್ಯಾಸದ ಕಾರಣದಿಂದ, ಟಾರ್ಗೆಟ್ ಉಪಗ್ರಹ ಒಂದು ದಿನದಲ್ಲಿ ಚೇಸರ್ ಉಪಗ್ರಹದಿಂದ 10-20 ಕಿಲೋಮೀಟರ್ ಮುಂದೆ ಸಾಗುತ್ತದೆ.

ಈ ಚಲನೆಯ ಬಳಿಕ, ಟಾರ್ಗೆಟ್ ಮತ್ತು ಚೇಸರ್ ಉಪಗ್ರಹಗಳು ಒಂದೇ ಕಕ್ಷೆಯಲ್ಲಿ, ಸಮಾನ ವೇಗದಲ್ಲಿ ಮುಂದೆ ಸಾಗಿದರೂ, ಅವುಗಳ ನಡುವೆ 20 ಕಿಲೋಮೀಟರ್‌ಗಳ ಅಂತರ ಹಾಗೇ ಇರುತ್ತದೆ. ಇದನ್ನು ಫಾರ್ ರೆಂಡೆಜ್ವಸ್ ಎಂದು ಕರೆಯಲಾಗುತ್ತದೆ. ರೆಂಡೆಜ್ವಸ್ ಎಂದರೆ, ಎರಡು ವಸ್ತುಗಳು ಬೇರೆ ಬೇರೆ ಸ್ಥಾನಗಳಿಂದ ಅಥವಾ ಮಾರ್ಗದಿಂದ ಹೊರಟು, ಬಳಿಕ ಸಂಧಿಸುವುದು ಅಥವಾ ಪರಸ್ಪರ ಹತ್ತಿರಾಗುವುದಾಗಿದೆ. ಡಾಕಿಂಗ್ ನಡೆಸುವ ಸಲುವಾಗಿ, ಚೇಸರ್ ಉಪಗ್ರಹ ಜಾಗರೂಕವಾಗಿ ಯೋಜಿಸಿರುವ ಕಾರ್ಯತಂತ್ರವನ್ನು ಬಳಸಿಕೊಂಡು, ಟಾರ್ಗೆಟ್ ಉಪಗ್ರಹದ ಬಳಿಗೆ ಹಂತ ಹಂತವಾಗಿ ಸಾಗಲಿದೆ. ಎರಡು ಉಪಗ್ರಹಗಳ ನಡುವಿನ ವೇಗಕ್ಕೆ ಸೂಕ್ತವಾದ ಹೊಂದಾಣಿಕೆಗಳನ್ನು ಮಾಡಿಕೊಂಡು, ಚೇಸರ್ ಈ ಅಂತರವನ್ನು ತಗ್ಗಿಸಲಿದೆ. ಎರಡು ಉಪಗ್ರಹಗಳ ನಡುವಿನ ಅಂತರ 5 ಕಿಲೋಮೀಟರ್, 1.5 ಕಿಲೋಮೀಟರ್, 500 ಮೀಟರ್, ಬಳಿಕ 225 ಮೀಟರ್, ಹಾಗೂ ಅಂತಿಮವಾಗಿ 3 ಮೀಟರ್‌ಗೆ ಇಳಿದು, ಬಳಿಕ ಡಾಕಿಂಗ್ ನಡೆಸಲಾಗುತ್ತದೆ.  

ಎರಡು ಉಪಗ್ರಹಗಳು ಪ್ರತಿ ಗಂಟೆಗೆ 28,800 ಕಿಲೋಮೀಟರ್ ವೇಗದಲ್ಲಿ, ಅಂದರೆ ವಾಣಿಜ್ಯಿಕ ವಿಮಾನದ 36 ಪಟ್ಟು, ಹಾಗೂ ಗುಂಡಿನ ವೇಗದ 10 ಪಟ್ಟು ಹೆಚ್ಚು ವೇಗವಾಗಿ ಸಾಗಲಿವೆ. ಆದರೆ, ಡಾಕಿಂಗ್ ನಡೆಸುವಾಗ ಅವುಗಳ ನಡುವಿನ ವೇಗವನ್ನು ಬಹುತೇಕ ಶೂನ್ಯಕ್ಕೆ ತಗ್ಗಿಸಲಾಗುತ್ತದೆ. ಆಧುನಿಕ ಥ್ರಸ್ಟರ್‌ಗಳು ಮತ್ತು ಸೆನ್ಸರ್‌ಗಳನ್ನು ಬಳಸಿಕೊಂಡು, ಅವುಗಳ ನಡುವಿನ ವೇಗದ ವ್ಯತ್ಯಾಸವನ್ನು ಪ್ರತಿ ಗಂಟೆಗೆ 0.036 ಕಿಲೋಮೀಟರ್‌ಗೆ ಅಥವಾ ಪ್ರತಿ ಸೆಕೆಂಡಿಗೆ 10 ಮಿಲಿಮೀಟರ್‌ಗೆ ಇಳಿಸಲಾಗುತ್ತದೆ. ಇದು ಅತ್ಯಂತ ನಿಧಾನ ಮತ್ತು ನಿಖರ ವಿಧಾನವಾಗಿದ್ದು, ಎರಡು ಬಾಹ್ಯಾಕಾಶ ನೌಕೆಗಳ ನಡುವೆ ಸುರಕ್ಷಿತವಾಗಿ ಸಂಪರ್ಕ ಕಲ್ಪಿಸುತ್ತದೆ.

ಒಂದು ಬಾರಿ ಎರಡೂ ಉಪಗ್ರಹಗಳು ಯಶಸ್ವಿಯಾಗಿ ಡಾಕಿಂಗ್ ನಡೆಸಿ, ತಮ್ಮ ಸಂಪರ್ಕವನ್ನು ಭದ್ರಪಡಿಸಿದ ಬಳಿಕ, ಅವುಗಳು ತಮ್ಮ ನಡುವೆ ವಿದ್ಯುತ್ ಶಕ್ತಿಯ ಹಂಚಿಕೆ ನಡೆಸಲಿವೆ. ಆ ಬಳಿಕ, ಅವುಗಳು ಅನ್‌ಡಾಕ್ ನಡೆಸಿ, ಪರಸ್ಪರ ಬೇರ್ಪಟ್ಟು, ತಮ್ಮ ಸ್ವಂತ ಉಪಕರಣಗಳನ್ನು ಬಳಸಿಕೊಂಡು ಪೂರ್ವಯೋಜಿತ ಕಾರ್ಯಾಚರಣೆಗಳನ್ನು ನಡೆಸಲಿವೆ. ಈ ಕಾರ್ಯಾಚರಣೆಗಳು ಮುಂದಿನ ಎರಡು ವರ್ಷಗಳ ಕಾಲ ನಡೆಯಲಿವೆ. ಚೇಸರ್ ಉಪಗ್ರಹ ಅತ್ಯಂತ ಹೆಚ್ಚಿನ ಗುಣಮಟ್ಟದ ಕ್ಯಾಮರಾ ಹೊಂದಿದ್ದು, ಇದು ಸಣ್ಣ ಆವೃತ್ತಿಯ ಕಣ್ಗಾವಲು ಕ್ಯಾಮರಾದ ರೀತಿಯಲ್ಲಿ ಕಾರ್ಯಾಚರಿಸಲಿದೆ. ಇದೇ ವೇಳೆ, ಟಾರ್ಗೆಟ್ ಉಪಗ್ರಹ ಒಂದು ಮಿನಿಯೇಚರ್ ಮಲ್ಟಿ ಸ್ಪೆಕ್ಟ್ರಲ್ ಪೇಲೋಡ್ ಹೊಂದಿದ್ದು, ಇದು ನೈಸರ್ಗಿಕ ಸಂಪನ್ಮೂಲಗಳ ಅಧ್ಯಯನ ಮತ್ತು ಸಸ್ಯ ಸಂಪತ್ತಿನ ವೀಕ್ಷಣೆಗೆ ಅವಶ್ಯಕವಾದ ಛಾಯಾಚಿತ್ರಗಳನ್ನು ಸೆರೆಹಿಡಿಯಲಿದೆ. ಡೆಕ್ಸ್ ಯೋಜನೆ ಪಿಒಇಎಂ-4 ಎಂದು ಕರೆಯಲ್ಪಡುವ, ಪಿಎಸ್ಎಲ್‌ವಿ ರಾಕೆಟ್‌ನ ನಾಲ್ಕನೇ ಹಂತವನ್ನು ಪ್ರಯೋಗಗಳನ್ನು ನಡೆಸಲು ಬಳಸಲಿದೆ. ಈ ಹಂತ ವಿವಿಧ ಶಿಕ್ಷಣ ಸಂಸ್ಥೆಗಳು ಮತ್ತು ಸ್ಟಾರ್ಟಪ್‌ಗಳು ನಿರ್ಮಿಸಿರುವ 24 ಪೇಲೋಡ್‌ಗಳನ್ನು ಒಯ್ಯಲಿದೆ. ಈ ಪ್ರಯೋಗಗಳು ಬಾಹ್ಯಾಕಾಶದ ಸೂಕ್ಷ್ಮ ಗುರುತ್ವಾಕರ್ಷಣೆಯ ಪರಿಸ್ಥಿತಿಯ ಅನುಕೂಲತೆ ಪಡೆದುಕೊಳ್ಳಲಿವೆ. 24 ಪೇಲೋಡ್‌ಗಳ ಪೈಕಿ 14 ಪೇಲೋಡ್‌ಗಳನ್ನು ಇಸ್ರೋ ಹಾಗೂ ಬಾಹ್ಯಾಕಾಶ ಇಲಾಖೆ ಅಭಿವೃದ್ಧಿ ಪಡಿಸಿದ್ದರೆ, ಉಳಿದ ಹತ್ತು ಪೇಲೋಡ್‌ಗಳನ್ನು ಇನ್-ಸ್ಪೇಸ್ ಬೆಂಬಲದೊಡನೆ ವಿಶ್ವವಿದ್ಯಾಲಯಗಳು ಮತ್ತು ಸ್ಟಾರ್ಟಪ್‌ಗಳಂತಹ ಖಾಸಗಿ ಸಂಸ್ಥೆಗಳು ನಿರ್ಮಿಸಿವೆ.